ອັດຕະປື ຮຽກຮ້ອງ ໃຫ້ສັງຄົມເພີ່ມສະຕິລະວັງຕົວ ຮັບມືກັບພະຍຸໄຕ້ຝຸ່ນ ໂນຣູ ແລະການລະບາຍນໍ້າໃນເຂື່ອນ.

spot_img

ອັດຕະປື ຮຽກຮ້ອງ ໃຫ້ສັງຄົມເພີ່ມສະຕິລະວັງຕົວ ຮັບມືກັບພະຍຸໄຕ້ຝຸ່ນ ໂນຣູ ແລະການລະບາຍນໍ້າໃນເຂື່ອນ.

ທ່ານ ວິທະຍາ ພົມມະຈັນ ຫົວຫນ້າພະແນກ ພະລັງງານ ແລະບໍ່ແຮ່ ແຂວງ ອັດຕະປື ໄດ້ລາຍງານສະພາບການກັກເກັບນໍ້າ ແລະການລະບາຍນໍ້າຈາກເຂື່ອນຢູ່ພາຍໃນແຂວງ ອັດຕະປື ທີ່ກໍາລັງໄດ້ຮັບຜົນກະທົບຈາກການພັດຜ່ານຂອງພະຍຸໄຕ້ຝຸ່ນ ໂນຣູ ເຊິ່ງເຮັດໃຫ້ມີຝົກຕົກຫນັກ, ລົມພັດແຮງ ແລະນໍ້າໄຫລຊຸ ສ້າງຄວາມເສຍຫາຍຫຼາຍພໍສົມຄວນ.

ແຕ່ທັງນີ້, ຢູ່ແຂວງ ອັດຕະປື ກໍມີເຂື່ອນໄຟຟ້າ 7 ແຫ່ງ, ທີ່ມີຄວາມສາມາດຮອງຮັບປະລິມານນໍ້າຝົນໃນບໍລິເວນອ່າງເກັບນໍ້າຄ່າສະເລ່ຍຂອງການຮັບນໍ້າໃນ 7 ເຂື່ອນ, ນັບແຕ່ເວລາ 8:00 ໂມງນາທີຂອງວັນທີ 28 ກັນຍາ 2022,

ພະຍຸໄດ້ເຄື່ອນໂຕເຂົ້າມາ ແລະເຮັດໃຫ້ເກີດມີປະລິມານນໍ້າເພີ່ມຂຶ້ນຢ່າງໄວໃນ 7 ເຂືີ່ອນປະມານ 8.168,5 ແມັດກ້ອນຕໍ່ວິນາທີຫລາຍກວ່າເກນປົກກະຕິ ແລະການປ່ອຍນໍ້າຂອງບັນດາເຂື່ອນທັງຫມົດທີ່ລົງສູ່ແມ່ນໍ້າເຊກະຫມານ ແລະເຊກອງປະມານ 680,53 ແມັດກ້ອນຕໍ່ວິນາທີ. ພ້ອມກັນນີ້, ຍັງມີເຂື່ອນຢູ່ແຂວງເຊກອງທີ່ເປັນເຂື່ອນມີປະລິມານນໍ້າປ່ອຍລົງສູ່ແມ່ນໍ້າເຊກອງ 2 ເຂື່ອນຄື:

ເຂື່ອນຫ້ວຍລໍາພັນໃຫຍ່ ແລະເຂື່ອນຫ້ວຍລໍາພັນຕອນລຸ່ມ, ໄດ້ມີການລະບາຍນໍ້າປະມານ 78 ແມັດກ້ອນຕໍ່ວິນາທີ, ສ່ວນມວນນໍ້າທີ່ຫລາຍມະຫາສານແມ່ນການປ່ອຍນໍ້າຈາກເຂື່ອນອາເລື່ອຍ ປະເທດ ສສ ຫວຽດນາມ ມີມວນນໍ້າທີ່ປ່ອຍປະມານ 2.500 ແມັດກ້ອນຕໍ່ວິນາທີ ລົງສູ່ແມ່ນໍ້າເຊກອງ.

ຕໍ່ກັບສະພາບດັ່ງກ່າວ, ທ່ານ ວິທະຍາ ພົມມະຈັນ ໄດ້ຮຽກຮ້ອງໃຫ້ພໍ່ແມ່ປະຊາຊົນໃນທົ່ວແຂວງ ອັດຕະປື ໃຫ້ມີຄວາມລະມັດລະວັງ, ກຽມຄວາມພ້ອມຮັບມືຕໍ່ກັບສະພາບດັ່ງກ່າວທີ່ອາດຈະເກີດຂຶ້ນໃນຕໍ່ຫນ້າ, ໃຫ້ມີສະຕິລະວັງຕົວ, ທັງກຽມຄວາມພ້ອມຫລາຍດ້ານເຊັ່ນ: ດ້ານວັດຖຸອຸປະກອນຮັບໃຊ້, ຈິດໃຈ, ເຄື່ອນຍ້າຍສັດລ້ຽງ, ເຄື່ອງຂອງໄປບ່ອນທີ່ສູງເພື່ອຄວາມປອດໄປແລະບໍ່ໃຫ້ພໍ່ແມ່ປະຊາຊົນວິຕົກກັງວົນຢ້ານກົວຈົນເກີນໄປ.

ຂ່າວ: ຂປລ

spot_img

ຍອດນິຍົມ